بایرام ایدی گئجه قوشو اوخوردو
آداخلی قیز بهی جورابین توخوردو
هر کس شالین بیر باجادان سوخوردو
آی نه گؤزهل قایدادی شال ساللاماق
بَهی شالینا بایراملیغین باغلاماق
قیش چیخدی، اوزو قارالیق کؤموره قالدی. بیرده بیز قالدیق، بیر قالاق آرزی دیلک. بیر دونیا حسرت. بیر بؤلوک اورهک، و...
یاز گلیر، بایرام گیر آتا بابالاریمیزین یادگاری «نوروز بایرامی» قیشین ایستی اوجاقلاریندان چیخیب، اهریمنین الیندهن قورتولوب «قیز قالاسی»، «قیزکؤرپوسو»ندهن کئچیب،
«آتیل باتیل چرشنبه باختیم آچیل چرشنبه»
دئیه آینا کیمی آیدین گونلر آرزیلاییب، سایاچیلارین سایالاری و عاشیقلارین سازلاری ایله ال بیر اولوب، کند – کؤوشنه ساری یولا دوشور.
نوروز گلیر، دونیا تزهلنیر، طبیعت یئنیلشیر، امّا بیز نئجه؟! تزهلیکدهن، یئنی لشمکدهن، دوزلوک دهن دوغرولوقدان بیزیمده خبریمیز وارمی؟ بیزده آغ بیرچک آنالارین صداقتلی اورهیی کیمی صاف بیر اورهیه صاحاب اولموشوق؟ یوخسا...! نه یه؟!
نوروز گلیر، دونیا میزا نئجه باخمیشیق. بوراجاخ نه ائتمیشیک؟!گلهجک نسلهنه تؤحفه میز واردیر؟ نئچه سرمایا...! نه جورهطبیعت! نه دوشونجه؟...نوروز گلیر... هارداییق، کیمیک، ...!؟
بو ایلی ده سونا یئتیردیک، بایراملیق اولسون دئیه نئچه سطیر اورهک سؤزو ایله نئچه بیت شعر یازیب تقدیم ائدهک، اومود کی یئنی ایلینیز آیدین، بوللوق، برکتلی، موبارک، گوللو- چیچکلی اولسون.
بو ایلیمیزی جور به جور سیاسی، اقتصادی هنری اولایلارلا سونا وئردیک. آجی – شیرین خاطیرهلرله آز – چوخ یاناشدیق، امّا هئچ بیریسی دونیاسوییه سینده اوز وئره ن قانلی فاجعهلردهن آجی اولمادی. بیز باهالیغا، تحریمه، ابرقدرتلرین ظولمونه دؤزدوک،قیشی کؤمورون اؤزو قارالیق قیمتینه قورتاردیق، امّا قانلی فاجعه لرده آیاق آلتیندا قالان خیرداجا اوشاقلارین آغلار گؤزلرینین دردلی باخیشلارینا دؤزه بیلمهدیک. اونلارلا بیرگه آغلادیق، اونلارا دهین یارا ائله بیلدیک بیزه دهیدی. بیزده اینسانیق، بیزیمده قلبیمیز وار.
رحمتلیک سعدی دئییر:
بنی آدم اعضای یکدیگرند
که در آفرینش ز یک گوهرند
چو عضوی به درد آورد روزگار
دگر عضوها را نماند قرار
تو کز محنت دیگران بی غمی
نشاید که نامت نهند آدمی
بیز جنگ یوخ، صولح، باریشیق، عشق، محبت عاشیقی ییک. بیزیم علم، هنر و صنعتیمیز صولحله باریشیق نامینه دیر. بیزیمچیراغیمیز تانریدان یاینر. هئچ کیمسه اونو سؤندوره بیلمز.
میللت یولودور حاق یولو دور گئتدیییمیز یول
ای حاق یاشا ای سئوگیلی میللت یاشا وار اول
رحمتلیک واحید بویورور:
ای گول منی سن ایستهسن عؤمروم هدر اولماز
صولح اولماسا ائولاد وطن بختهور اولماز
آزادهلیگی صولحو سئوهرلر بیزیم ائللر
بیر یئرده کی صولح اولسا او یئرده ضرر اولماز
ساغ اولون ساغلیقلا قالین.یئنی ایل بایرامینیز موبارک اولسون