رعنا کیمی اولماز..
هر گول آچیلا، اول گولی-رعنا کیمی اولماز،
هر عاشق اولان بولبولی-شیدا کیمی اولماز!
مین لرجه بو دونیایا گؤزللر گله بیرده،
من سئودییم اول شوخی-دل آرا کیمی اولماز!
گولدن او تمنّانی کی،بولبول قیلیر هردن،
مین باشقا تمنّا بو تمنّا کیمی اولماز!
فخر ائتمه سین اؤز سئودییی لئیلاسینا مجنون،
مین لئیلی اگر گلسه،بو لئیلا کیمی اولماز!
واحید،دئمه کی،عطریلی گوللر یئتیشیبدیر
هر عطر گلیب عنبری-سارا کیمی اولماز!
"علی آقا واحید"
