یات گوزوم یات بو گئجه بیر دورو رؤیایه قوناقسان
دونن آخشام چاغی یئللر آپاریپلار سنون عشقون
اوجا یارین او گوزل خاطیرینه ایندی قوجاقسان
یاتگیلان پنجره دن آی ایشیقی کیپریگون اؤپسون
ایندی کی آی پاراسیندان نئچه ایل لَردی اوزاقسان
سپدیگون سو قوروماز ؛ آغلاماسون بیر نئچه گوندَه
چؤخ زاماندیر ؛ کوچه لرده ؛ گوزی آغلار اوتوراقسان
گئچیب ایل لَر ؛ تؤرَه نیر دوپ دوری سو گؤز بولاقوندان
قوری کؤیشندَه آخان زمزمه لی ؛ گوجلی بولاقسان
قؤیگیلان سئللرون آشسین ؛ قوری صحرالره داشسین
اوزاق اؤلسوندا دنیزدن ؛ یئنه دریایه دایاقسان
قیرمیزی رنگووه باخدیقجا شافاق یادیما دوشدی
بیلمورم؟! شاید عزیزیم بیر آخار قانه بؤیاقسان
سنی بیر آق چیچگیلن یازا تاپشیردیم ؛ عزیزیم
نه اولوب ؟ غؤنچالی بیر لاله گوله ایندی بوداقسان