چیلله گئجه‌سی - ایلین 365 گونونون اوزون گئجه‌سی‌دیر. بو گئجه، شمسی ایلی‌نین، دی آیین باشلاندیغی گئجه‌سی - آذر آیی‌نین سونونجو گئجه‌سی و اوچ آی نووروز بایرامینا قالمیش بیر گئجه‌دیر ونهایتده پاییز فصلی¬نین آخر گئجه سینه چیلله گئجه¬سی دییلرکی. بو گئجه جاوانلار طایفادا بیرآغ ساققالین ائوینه یغیشیب و شادلخ ائیلرلر. اوشاقلاردا اوز آتا وآناسینین ائینه گئدیب و جشن توتارلار. بو گئجه‌ده قارین یاغماسی چوخلو سئوینج یارا‌دار.

چیلله ایکی قیسمت اولار: بؤیوک چیلله قیرخ گوندور کی دی آیی‌نین ایلک گونوندن باشلاناراق بهمن ین اونوناجان دوام تاپار و کیچیک چیلله ییر می‌گون دور کی بهمن‌ین آخیریناجان ادامه سی اولار و خلق ایچره دیئه‌رلر کی کیچیک چیلله بؤیوک چیلله‌دن قار- بورانلی و دونداریجی اولار.
قدیم ناغیللارا گؤره بیر قاری ننه واریمیش کی اونون ایکی اوغلو واریمیش. بؤیوک قارداشین آدی بؤیوک چیلله و کیچیک قارداشین آدی بالا چیلله دیر.
بؤیوک چیلله نین عؤمرونون آخیر گؤنلرینده، بالا چیلله بؤیوک چیلله نین یانینا گئدیب و بئله دییر؛

کیچیک چیلله بؤیوک چیلله‌دن سوروشار: «سن گئتددون نئینه دون؟»
بؤیوک چیلله دئیه‌ر: «من گئتدیم دونداردیم. اوشوتدوم. ناخوشلاتدیم گلدیم».
کیچیک جیلله دئیه‌ر: «اگر من گئدسم، قاری‌لاری کورک‌دن، لو لئهین‌لری لولک دن، گلین‌لری بیلک‌دن، کؤرپه‌لری بلک‌‌دن، ائیله‌رم.»
اوندا بؤیوک چیلله تمسخر حالدا دئیه‌ر: «عؤمرون آزدی گؤتون یازدی».

بالا چیلله اولدوغو قدر، شاختانی بوتون اؤلکه لره سالیب و بو گؤنلردن بیر گؤن، بیر داغین دالداسیندا قار الیئله ایسارته دوشور. خبر چاتار قاری ننه یه و او اوغلونو قار دوستاقیندان قورتارماغ ایچین ، داغا گئدیب و اؤدونان داغلانمیش بیر شیشینن قارینان ساواشماغا گئدر. آنجاق قارلارین هامیسینی اریدر. بالا چیلله اؤزون آزاد حیس ائتدیغیننان سونرا، گؤرر دا او گؤن قیش قوتاریب و "بایرام آیی" (اسفند آیی) باشلانیب.

او گؤندن کی قاری ننه اؤد اوستونده شیشی داغلاییب، بیر آیا قدر هر گئجه چرشنبه اؤدو، اؤدلانار کی بو، قاری ننه نین ایرثی دیر و هره سینین بیر آدی وار. بو آدلار بئله دیر؛ "یالانچی چارشنبه"، "کوله چارشنبه"، "خبرچی چارشنبه" و ایلین آخیر چرشنبه سی کی هامان چرشنبه سوری یه تانیلیب، "دوغروچو چارشنبه" آدلانیر کی یازین باشلانیشیندان آسیلیدیر.